Mu kiganiro yagiranye n’ikimenyeshamakuru le Figaro, Dr. Jean Marc Bohbot, umuhinga mu bijanye n’ibice nyibarukiro vy’abagore avuga ko ijoro ari umwanya mwiza washizweho wo kuruhurira umubiri wose rero ko umuntu akwiye gukuramwo agahuzu kiwe ko musi mbere yokwambara impuzu yo kurarana nayo ntibe imufashe kugira ngo umubiri w’imbere nawo ubone ubuhemero, avuga kandi ko nta mpamvu n’imwe ishobora kuba yotera umuntu kurarana impuzu yo kurarana (Pinjama) kiretse igihe ukwezi kwiwe kwageze gusa.

Dr. Jean Marc abandanya avuga ko kwambara agahuzu ko musi umusi wose ugaheza ukanakararana ari bibi cane kuko bituma umuntu arwara zimwe mu ngwara ziterwa na bacteria zikurira mu gitsina. Agahuzu ko musi ngo kongereza ubushuhe hariya hantu akaba ari navyo bituma haba inzira yo kurokoka kwa za bacterie ari zo zizana za ngwara twavuze haruguru, kiretse ivyo kandi ngo ubwo bushuhe bwose butuma umuntu yumagara ntabashe kugira ubutotahare.

Iyi rero ni yo mpamvu nyamukuru yatumye umuhinga Dr. Jean Marc ashira ahagaragara ibi vyose kugira ngo n' uwutari azi ububi bwo kurarana agahuzu ko musi abimenya kuko kenshi abantu bakunze kurwara zimwe mu ngwara ziterwa n’ubushuhe bwinshi buba mu gitsina ariko ntibabashe kumenya ko ikibitera ari ukudaha ukwisanzura umubiri wabo wose uko uri ukaruhuka bihagije cane ko mu gihe ca kumutaga biba bitoroshe kuwuha ukwisanzura.